Ísraelsher réðst í gær Palestínumenn sem biðu eftir bílalest með neyðarsendingum af hveiti. Eftir því sem heilbrigðisráðuneytið á Gaza-strönd segir eru tugir látnir og særðir eftir árásina. Staðfest er að níu létust en mannfallið gæti verið meira. Aðeins eru fimm dagar síðan Ísraelar myrtu yfir 100 manns og særðu hundruð í árás á hóp fólks sem beið neyðaraðstoðar.

Árásin var gerð suður af Gazaborg. Samkvæmt því sem Xinhua fréttastofan greinir frá skutu ísraelskar hersveitir á fólkið þar sem það beið við Kúveit-hringtorgið eftir bílalestinni. 

Hamas-samtökin lýstu því að árásin, í samhengi við fyrri árásir á bílalestir með neyðarhjálp, væri áður óþekkt grimmdar- og glæpaverk í nútímanum. Fyrr í gær vörpuðu ísraelskar herrflugvélar sprengjum á bíl með neyðaraðstoð í Deir al-Balah í miðju Gaza. Samkvæmt því sem palestínska ríkissjónvarpið fullyrti létust að minnsta kosti átta í þeirri árás. 

Á fimmtudaginn létust að minnsta kosti 118 Palestínumenn í fjöldamorði Ísraelshers, þegar skotið var á fólk sem beið neyðaraðstoðar. Á áttunda hundrað særðust. Ísraelsher hefur haldið því fram að flestir sem létust hafi troðist undir en það er í ósamræmi við önnur gögn, þar á meðal vitnisburði fólks sem lifði af árásina. Sameinuðu þjóðirnar gáfu út að mikill fjöldi manns hefði verið færður á al-Shifa sjúkrahúsið í Gazaborg með skotsár eftir árásina. Fréttastofur sem hafa rannsakað myndbönd af árásinni sem Ísraelsher birti segja að átt hafi verið við myndböndin þannig að þau sýni ekki samfellda atburðarrás heldur hafi verið klippt í fjögur myndskeið. 

Árásin á fimmtudaginn vakti hrylling og reiði um heim allan. Fjöldi ríkja hefur kallað eftir því að Sameinuðu þjóðirnar láti fara fram opinbera rannsókn á árásinni.