Lífleg og hvöss umræða hefur skapast á síðu Egils Helgasonar á facebook þar sem blaðamaðurinn góðkunni skrifar með gagnrýnum hætti um svokallaða athafnamenn.

Egill bendir á að í eina tíð hafi hugtakið staðið undir nafni. Dæmi um athafnamenn hafi verið Alli ríki fyrir austan eða Pálmi í Hagkaup. Svo deilir hann frétt um mann sem er grunaður um misjafna hluti en kallaður athafnamaður.

„Nú er eins og merkingin hafi breyst og orðið athafnamaður sé notað um menn sem setja fyrirtæki á hausinn en rísa upp aftur, dansandi á mörkum þess sem er löglegt og siðlegt,“ segir Egill.

Við þessu bregst athafnamaðurinn Þorvaldur Lúðvík Sigurjónsson, fyrrum bankastjóri sem fékk á sig fangelsisdóm eftir hrun. Hann varð síðar forstjóri Niceair sem flaut beint frá Akureyri skamman tíma áður en reksturinn fór á hausinn.

„Nokkurs konar Jantelov, Jörvagleði, illmælgi og illkvittni í sömu tilfinningu. Ef menn meika það eru þeir glæpónar og gróðapungar, ef illa gengur eru þeir lúserar eða tukthúsmatur,“ segir Þorvaldur Lúðvík.

Svo hnykkir hann út svo undan svíður með því að hjóla persónulega í Egil: „Er ekki bara best að vera ríkisstarfsmaður á jötunni, Egill Helgason?“

Egill svarar fullum hálsi:

„Er það að vera á jötu að starfa hjá ríkinu? Hvaða vitleysa er þetta?“

Þorvaldur Lúðvík skrifar þá:

„Tjah, jatan sú virðist ótæmandi. Þekki ekkert til þessa manns, en sem Íslendingum virðist okkur tamara að dæma og gagnrýna fremur en hrósa og samgleðjast“

„Hvað er að þér?“ Spyr Egill þá. „Hvers konar fásinna er þetta? Ríki og sveitarfélög standa í margvíslegri þjónustu við borgara þessa lands og að því kemur ólíkt fólk með alls konar bakgrunn og menntun. Og fæst á háum launum.“