Í næstu viku mun þrjátíu manna hópur nepalskra hermanna og sérpneskra leiðsögumanna halda í grunnbúðir Everest. Tilgangurinn: Að týna saman tíu tonn af rusli af hæsta fjalli heims, og flytja til byggða lík fimm fjallgöngumanna. 

Klifurtímabilið í Himalajafjallgarðinum er um það bil að hefjast en undanfarin fimm ár hefur það hafist á því að fjarlægja rusl og hvers konar úrgang af Mount Everest. Frá árinu 2019, þegar sérstakt átaksverkefni þar um hófst, og fram til síðasta árs hefur nepalski herinn með aðstoð Sjerpa safnað saman 110 tonnum af rusli og komið því til byggða. 

Þá stendur, sem fyrr segir, til að flytja til byggða lík fimm fjallgöngumanna sem létust í tilraun sinni til að sigrast á fjallinu. Gríðarlegum erfiðleikum er bundið að nálgast lík fjallgöngufólks sem dáið hefur á Everest sökum veðurs, súrefnisskorts og allra aðstæðna. Á síðasta ári létust tólf fjallgöngumenn á fjallinu svo staðfest sé, og fimm er enn saknað, þó ljóst sé að þeir hafi einnig látist. 

Langflestir þeirra sem reyna að klífa hið 8.849 metra háa fjall gera það frá Nepal, þó einnig sé hægt að klífa fjallið frá Tíbet. Á síðasta ári gáfu nepölsk stjórnvöld út leyfi til handa 478 fjallagöngumönnum sem hugðust reyna sig við fjallið, og hafa þau aldrei verið fleiri. Fjöldi fólks á fjallinu er þó margfalt hærri þar eð sérpneskir leiðsögumenn, aðstoðarfólk hvers konar auk annarra eru einnig á staðnum. Af þessum sökum hefur síðustu ár verið mikil mannþröng á Everest og gríðarleg uppsöfnun á rusli. 

Einn mesti umhverfisvandinn er úrgangur úr fólki, eða á mannamáli, mannaskítur. Á þessu ári, í fyrsta skipti, verður öllum göngumönnum skilt að taka úrgang sinn með sér, í sérstökum pokum sem nepölsk stjórnvöld útvega hverjum og einum. Lætur nærri að bara þeir 478 fjallgöngumenn sem reyndu sig við Everest í fyrra hafi skilið við sig um 1,5 tonn af mannaskít, og þá á eftir að taka tillit til allra hinna.