Hvar er virðingin fyrir verkefninu?
Þannig spyr Þorbjörg Sigríður Gunnlaugsdóttir, þingmaður Viðreisnar og gerir meðal annars að umræðuefni rifrildi ríkisstjórnarinnar sem ómar nú um allt land sem aldrei fyrr.
Offramboð er af greinum og facebook-statusum þar sem stjórnarliðar kvarta undan samstarfinu, að mati þingmannsins. Má nefna færslu Jódísar Skúladóttur í morgun á facebook þar sem hún sem þingmaður VG hæðist að Óla Birni Kárasyni og Jóni Gunnarssyni, þingmönnum Sjálfstæðisflokksins.
„Mér hefur stundum fundist þessi ríkisstjórn vera eins og óhamingjusöm hjón sem rífast úti á svölum og allt hverfið engist við að hlusta á þau,“ segir Þorbjörg Sigríður.
Pattstaða virðist uppi í stórum málum sem stjórnin kemur sér ekki saman um.
Þorbjörg Sigríður segir óljóst hvort Katrín Jakobsdóttir hafi í raun leitt hægristjórn eða hvort Bjarni Ben sé nú forsætisáðherrra vinstri stjórnar.
„Stærsti vandinn er samt ekki hvor merkimiðinn er réttari heldur að þessi stjórn ber enga virðingu fyrir verkefninu og er haldin algjöru verkstoli,“ segir þingmaður Viðreisnar.
Á sama tíma búi þjóðin við sturlaða vexti, biðlistar séu vörumerki heilbrigðiskerfisins og stórir hópar barna ljúki grunnskóla án þess að geta lesið almennilega.
