Morgunblaðið er í aldreifingu í dag en þrátt fyrir það kjósa ritstjóra blaðsins, Davíð Oddson og Haraldur Johannessen, að endurróma hommahatur á síðum blaðsins. Í Staksteinum blaðsins í dag má finna endurbirtingu á bloggi Páls Vilhjámssonar framhaldskólakennara. Ekki er hægt að lýsa innihaldi bloggsins öðru vísi en sem stæku hommahatri.
Fyrir þá sem þekkja ekki til Morgunblaðsins þá má segja að Staksteinar séu vettvangur fyrir ritstjóra blaðsins að endurróma það sem þeim fellur sérstaklega til geðs. Þannig er ákveðinn stigsmunur á aðsendri grein og ritstjórnarpistli, en Staksteinar í raun sameina þetta tvennt. Því má líta svo á að hommahatrið sem birtist í Staksteinum sé ritstjórnarstefna blaðsins.
Morgunblaðið er styrkt af ríkinu um tæplega 70 milljónir ár hvert. Fjölmiðlinn væri fyrir löngu farinn í þrot ef það væri ekki fyrir útgerðarfélög sem niðurgreiða reksturinn. Hommahatrið er því í boði íslenskra skattgreiðenda og kvótakónga.
Hér fyrir neðan má svo lesa bloggið sem Morgunblaðið kýs að endurróma.
Páll Vilhjálmsson segir m.a. í nýlegum pistli sínum:
Ágengni samtaka gagnvart börnum sýnir að undir fagurgala um fjölbreytileika er ráðist á garðinn þar sem hann er lægstur, vammlausri og óreyndri æsku sem býr ekki að stálpaðri dómgreind. Fullorðinn sem talar fávisku ofan í börnin, t.d. að hægt sé að fæðast í röngu kyni, nýtir sér barnslegt sakleysi óharðnaðra ungmenna.
Foreldrar vakna upp við þann vonda draum að kyn- og kynlífspælingar sem þeim dytti aldrei í hug að halda að börnum sínum er skipulega flaggað framan í börnin þegar foreldrar eru fjarri.
Hvers vegna er lífsskoðunarfélaginu Samtökunum 78 hleypt inn í leik- og grunnskóla? Ástæðan er pólitísk. Vinstriflokkarnir, þ.e. Vinstri grænir, Samfylking, Píratar og Viðreisn eru allir hlynntir kreddum og hugmyndafræði Samtakanna 78. Vinstrimenn eru stærsti hópurinn í fræðslu- og skólastarfi. Ekki dettur þeim í hug að amast við verulega óæskilegri þróun þar sem börn eru leiksoppar í furðuveröld jaðarhóps fullorðinna.
Umræðan síðustu vikna og daga sýnir að lífsskoðunarfélagið Samtökin 78 á ekkert erindi með sérviskuskoðanir um kyn og kynlíf inn í leik- og grunnskóla. Það voru mistök að hleypa Samtökunum 78 í skólastarf. Þau mistök ber að leiðrétta.
