Starfsgreinasambandið og SA búin að semja

Samkvæmt heimildum Samstöðvarinnar er nú flest klárt fyrir undirritun nýrra kjarasamninga í karphúsinu milli Starfsgreinasambandsins og Samtaka atvinnulífsins. Innihaldið er líkt og Samstöðin sagði frá um miðra viku, nema hvað hækkunin er 22 þús. kr. á mánuði en ekki 20 þús. og 13 þús. kr. hagvaxtaraukinn kemur til útgreiðslu frá 1. nóvember síðastliðnum.

22 þúsund króna hækkun á lægstu laun jafngildir tæplega 6% hækkun. Auk þess fá þau sem hafa starfað lengur en 5 ár hjá sama fyrirtæki 3% hækkun. Það er því samið um 9% hækkun til þeirra sem mest fá.

13 þús. kr. hagvaxtaraukinn tilheyrir lífskjarasamningunum og því kannski eðlilegt að meta flýtingu hans frá 1. maí á næsta ári til 1. nóvember síðastliðins sem einskonar eingreiðslu upp á 78 þús. kr, sem reyndar dreifist á sex mánuði.

Þá er samið um sérstakar greiðslur til fiskverkafólks. Bónusgreiðslur hækka um 8% víðast en meira hjá Samherja fyrir norðan. Ekkert liggur fyrir um hvað ríkisstjórnin leggur til. það er heldur engin ákvæði um varnir gegn verðbólgu.

Ekki er einhugur meðal Starsfgreinasambandsins. Aðalsteinn Árni Baldurson formaður Framsýnar er sagður hafa skrifað undir tregur en Hörður Guðbrandsson formaður Verkalýðsfélags Grindavíkur neitaði að skrifa undir samninginn.

Um leið og gengið var frá samningi við Starfsgreinasambandið ákváðu iðnaðarmenn að fara í samflot með VR og Landssambandi íslenzkra verzlunarmanna.

Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Skrá mig arrow_forward

Rauða borðið
í beinni
Rauða borðið, 24. maí