Vilja ákvæði í samninga til varnar verðbólgu og vöxtum

VR og samflot iðnaðarmanna vilja ákvæði í kjarasamninga sem tryggir launafólk gegn verðbólgu og hækkun vaxta. Þetta er forsenda þess að félögin gangi til viðræðna um stuttan kjarasamning.

Ragnar Þór rekur á Facebook hversu mikið forsendur efnahagsmála geta breyst á stuttum tíma, birtir þar yfirlit á breytingunum nú frá því fyrir fjórtán mánuðum:

14 mánaða kjarasamningur er vissulega stuttur tími en hvað hefur gerst á 14 mánuðum? skrifar Ragnar. Og listar síðan þetta upp:

  • Fyrir 14 mánuðum voru stýrivextir 1,5% en eru í dag 6%
  • Fyrir 14 mánuðum var 12 mánaða verðbólga 4,4% en er í dag 9,3%
  • Fyrir 14 mánuðum stefndi í metafkomu fyrirtækja, í dag stefnir í enn betri afkomu.
  • Árið 2021 voru hreinar vaxtatekjur bankanna 72,2 milljarðar en stefna í að verða yfir 102 milljarðar fyrir árið 2022.
  • Árið 2021 var hagvöxtur 4,4 en stefnir í að fara yfir 6,5% árið 2022.

„Gríðarleg óvissa blasir við íslenskum heimilum en óvissan í atvinnulífinu og fjármálakerfinu snýst að mestu um hversu mikil aukning verður á afkomu frá metárinu í fyrra,“ skrifar Ragnar. „Þess vegna er mikilvægt að verkalýðshreyfingin setji fyrirvara í kjarasamninga um aukin kaupmátt, lægri verðbólgu og vaxtastig og raunverulegan hvata fyrir atvinnulífið um að slík markmið náist. Því það er ansi margt sem getur breyst á stuttum tíma. Atvinnulífið hefur ekki sýnt vott af samfélagsábyrgð á miklum óvissutímum heldur nýtt sér viðkvæma stöðu til að skapa sér fordæmalaust góðæri á kostnað almennings.“

Verkalýðsfélag Grindavíkur skrifaði ekki undir samning Starfsgreinasambandsins einmitt vegna skorts á þessum tryggingum. Samninganefndin fundaði á sunnudaginn og ítrekaði þessa afstöðu. Nú leitar félagið að samfloti sem hentar inn í viðræðurnar. Þar kemur til greina VR og iðnaðarmennirnir, Efling eða hvort tveggja.

Hörður Guðbrandsson formaður lýsti stöðunni við Rauða borðið.

Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Skrá mig arrow_forward

Rauða borðið
í beinni
Rauða borðið, 24. maí