Félagsmenn Eflingar á Íslandshótelum á höfuðborgarsvæðinu samþykktu að fara í verkfall í næstu viku með 68% atkvæða þeirra sem tóku afstöðu. Kjörsókn var góð, eða 66%. Verkfallið hefst þriðjudaginn 7. febrúar.

Í yfirlýsingu frá Eflingu segir að samninganefnd Eflingar fagni hugrekki verkafólks á Íslandshótelum. Einnig að samninganefndin hefði samþykkt næstu lotu verkfallsboðana. Þær hafa hins vegar ekki verið kynntar.

„Stjórnendur Íslandshótela beittu starfsfólk miklum þrýstingi og ólögmætum hótunum um tekjumissi tækju þau afstöðu með verkfalli,“ segir í yfirlýsingu Eflingar. „Er það skýrt brot á ákvæðum laga um stéttarfélög og vinnudeilur. Var allt starfsfólk skikkað á sérstaka fundi þar sem stjórnendur ræddu um kjaradeilu Eflingar við SA á villandi og einhliða hátt, og komu hótunum sínum í þá veru óspart á framfæri. Bárust félaginu margar kvartanir frá félagsfólki vegna þessa.“

„Ríkissáttasemjari samþykkti sérstaka miðlunartillögu sem tímasett var til að koma í veg fyrir að félagsfólk Eflingar hjá Íslandshótelum fengi að nýta sér rétt sinn til verkfalls. Hann endurtók jafnframt hótanir atvinnurekenda um tekjumissi,“ heldur yfirlýsingin áfram. „Tveir ráðherrar Vinstri grænna í ríkisstjórn, Guðmundur Ingi Guðbrandsson félags- og vinnumarkaðsráðherra og Katrín Jakobsdóttir forsætisráðherra, vissu af miðlunartillögu ríkissáttasemjara áður en hún var kynnt samninganefnd Eflingar. Ráðherrarnir stigu fram opinberlega til stuðnings við miðlunartillöguna þrátt fyrir háværa gagnrýni allra heildarsamtaka launafólks á hana.“

Myndin er af samninganefndinni að fagna niðurstöðunni.