Halldór Benjamín Þorbergsson, framkvæmdastjóri Samtaka atvinnulífsins, hefur ákveðið að láta af störfum hjá samtökunum en hann mun taka við nýju starfi á næstunni, segir í tilkynningu frá SA, en Halldór Benjamín hefur verið ráðinn forstjóri Regins.
„Það eru óneitanlega blendnar tilfinningar sem fylgja því að kveðja þennan vettvang, enda eru alger forréttindi að gegna starfi framkvæmdastjóra SA,“ er haft eftir Halldóri Benjamín í tilkynningunni. „Starfið hjá SA hefur verið mjög lærdómsríkt og skemmtilegt en það er á sama tíma engum hollt að vera í slíku starfi of lengi. Ég veit að ég skil við starf samtakanna í góðum höndum, hjá öflugum hópi starfsfólks og stjórnarmanna, sem ég hef verið svo lánsamur að eiga gott samstarf við á þeim tæpu 7 árum sem ég hef gegnt þessu starfi.“
Reginn er að lang stærstum hluta í eigu lífeyrissjóða. Og SA og aðildarfélög þess skipa helming stjórnarmanna í sjóðunum. Stærsti einkafjárfestirinn í Reginn er Brimgarður, fjárfestingafélag Mata-systkinanna sem eiga Ölmu leigufélag.