Þeir sem leita til Hjálpræðishersins í hádeginu hafa líklega sjaldan verið fleiri. Í febrúar voru matarskammtarnir um 5.400, eða 190 á dag að meðaltali, samanborið við tæplega 2.900 á sama tíma í fyrra. RÚV greinir frá þessu.

Að sögn Hjördísar Kristinsdóttur, svæðisforingja hjá Hjálpræðishernum á Íslandi, þá er útskýringin á þessu nokkuð augljós. „Það er náttúrlega orðið erfiðara fyrir fólk að ná endum saman,“ hefur RÚV eftir henni.

Hjördís segir þó óvíst hvort samstökin geti haldið áfram að fæða hina hungruðu. Auk frjálsra framlaga þá eru samtökin með þjónustusamning við Reykjavíkurborg upp á 15 milljónir.

 „Það segir sig sjálft að þegar fimm þúsund manns koma að borða hjá okkur í hverjum mánuði þá dugar það nú skammt. […] Sjóðir okkar eru orðnir frekar þurrir eftir að aðsóknin jókst svona mikið. Við þurfum að velta því fyrir okkur hvort að þetta sé eitthvað sem við getum hreinlega haldið úti lengur.“