Fréttamenn Samstöðvarinnar tóku rölt niður Lækjargötu til að athuga með stemninguna á Leiðtogafundinum sem hófst í Hörpu í dag. Mjög fáir gangandi vegfarendur voru á ferð, götur girtar af og lögreglubílar sátu á víð og dreif um svæðið. Annað slagið þutu fram hjá rándýrir Audi jeppar með sendiferðabílum á eftir sér og einstaka einkaþota flaug yfir okkur. Þetta var líkt og að vera einn á vappi mjög snemma morguns á hásumri fyrir utan þá áþreifanlegu spennu sem var í loftinu. 

Fréttamenn tóku upp síma til að mynda bílana sem þutu annað slagið hjá og tóku eftir að við það spenntust lögreglumennirnir eilítið upp. Leyniskyttur höfðu, bersýnilega, komið sér fyrir ofan á húsi Seðlabankans og Hörpu. Vopnaðir lögreglumenn trygðu að vegurinn að Hörpu væri lokaður. Fréttamenn tóku nokkrar myndir frá Arnarhóli undir öruggu sjónmáli leyniskyttanna en innan skamms nálguðust tvær íslenskar löggur með vélbyssur og vildu fá kennitölur fréttamannanna. 

Það var ágætis tónn í þeim en þó fann maður að töluverð spenna var í loftinu. Drónar á vegum lögreglunnar tóku á flug þegar við löbbuðum í burt og tveir ungir strákar, ekki meira en tíu eða tólf ára, hjóluðu upp að okkur. „Mér líður eins og einhver sé að fara skjóta mig í andlitið“ sagði einn og sagðist hræddur.

Fréttamenn geta staðfest að það var nokkuð óþægilegt að vera undir taugastrekktu eftirliti leyniskyttanna á þessum annars fína degi.

Hér fylgja nokkrar myndir og myndskeið sem voru tekin í dag.