Samkvæmt nýrri rannsókn, sem birt var í dag í vísindatímaritinu Joule, þá myndu róttækar aðgerðir í loftslagsmálum ekki koma til með að valda langflestu fólki neinum teljanlegum efnahagslegum skaða.
Ef stemma eigi stigu við loftslagsbreytingum og reyna að forðast miklar náttúruhamfarir á næstu árum og áratugum, þá er nauðsynlegt að skera róttækt mikið niður í notkun jarðefnaeldsneyta undireins – og hætta notkun þeirra alfarið á næstu örfáu áratugum. Það er einfaldlega ekki um annað ræða ef takast eigi að forðast allra verstu áhrifin, sem vísindamenn hafa ítrekað greint sem katastrófur á ólýsanlegum skala.
Hinsvegar, þá hafa gagnrýnendur aðgerða í loftslagsmálum ítrekað komið með þau rök að slíkar aðgerðir myndu hafa gríðarlega neikvæð efnahagsleg áhrif á almenning. Benda þeir á að svo róttækur niðurskurður í notkun jarðefnaeldsneytis myndi hafa svo mikil áhrif á efnahag heimsins, að afleiðingin yrði mikill samdráttur – sem vinnandi fólk myndi einna helst þurfa að bera kostnaðinn af.
Rannsóknin sem birt var í dag kemst þó að þeirri niðurstöðu að slíkar aðgerðir myndu lítil sem engin áhrif hafa á efnahag yfirgnæfandi meirihluta fólks. Kostnaðurinn myndi að nánast öllu leyti lenda á miklum minnihluta – þeirra allra ríkustu.
Samkvæmt rannsókninni myndi 2/3 af fjárhagslega tapinu lenda á hinum ríkustu 10%. Á sama tíma bendir hún á að það litla tap sem myndi skella á hina er eitthvað sem ríkið væri ekki í neinum vandræðum með að bæta þeim upp með markvissum mótvægisaðgerðum.
Með öðrum orðum: þeir einu sem hafa eitthvað að óttast fjárhagslega útaf róttækum aðgerðum í loftslagsmálum eru þau allra ríkustu. Meirihluti almennings hefur nákvæmlega ekkert að óttast í þessum málum, samkvæmt þessari nýju skýrslu.