„Þingflokkur Pírata hefur kallað eftir stuðningi allra þingflokka til að leggja fram frumvarp um bann við hvalveiðum um leið og þing kemur saman að nýju,“ tilkynnti Halldóra Mogensen, þingmaður Pírata, á Facebook um hádegisbil nú á fimmtudag, stuttu eftir að ríkisstjórnarfundi á Egilsstöðum lauk og matvælaráðherra tilkynnti að hvalveiðar hefjist á ný á morgun, 1. september. „Píratar kalla eftir því að málið fái vandaða þinglega meðferð og að þingið taki afstöðu með umhverfinu, loftslaginu, dýravelferð og framtíðinni,“ sagði hún ennfremur.

Blaðamaður hafði samband við Halldóru og spurði hvort ákvörðun ráðherra hefðu verið vonbrigði. „Já, auðvitað,“ svaraði hún, „þetta eru gífurleg vonbrigði. Ég er optimisti í eðli mínu og trúði því að Svandís myndi standa á sínu. En svona er þetta.“

Þar sem Píratar voru tilbúin með frumvarp um hvalveiðibann lá beint við að spyrja hvort þau hafi þó allt eins gert ráð fyrir þessari niðurstöðu ráðherrans. Halldóra svaraði því til að þau hefðu lagt frumvarpið fram hvernig sem ríkisstjórnarfundinum hefði lokið. „Við vorum tilbúin með þetta mál, bann á hvalveiðum, af því að við hefðum lagt það fram hvernig sem færi. Þótt að Svandís hefði framlengt bannið nú í sumar væri það bara tengt starfsleyfi, það væri samt leyfilegt að veiða hval á Íslandi. Við viljum banna það. Við viljum bara að það sé bannað að veiða.“

Aðspurð hvort Píratar eru vongóð um þátttöku stjórnarliða í málinu, þegar það verður lagt fyrir þingið, svaraði Halldóra „já, einhverra allavega. Við erum alltaf vongóð um að fólk vilji taka þátt í að berjast fyrir góðum málefnum.“