„Auðvitað er eina vitið í þessu forkastanlega samráðsmáli skipafélaganna að banna starfsemi þeirra með lögum og stofna eitt ríkisrekið skipafélag.“ Þetta segir gagnrýnandinn geðþekki, Jón Viðar Jónsson, á Facebook en hann er einn margra sem hefur blöskrað hvernig Samskip og Eimskip hafa makað krókinn á kostnað almennings.

Jón Viðar segir að það þýði ekkert setja sektir á þessi félög. Þó hann taki það skýrt fram að hann sé ekki sósíalist þá sjá hann enga aðra lausn í þessu máli en að ríkisvæða þessi fyrirtæki. Það sé einungis spurning um almenna skynsemi.

„Að setja á sektir eða jafnvel að senda gangsterana í tukthús vitum við að er þýðingarlaust. Meiraaðsegja Ólafur Step viðurkennir að „markaðurinn“ hafi engin tæki til að koma í veg fyrir svona svínarí, en hangir svo ámátlega í því að efla þurfi samkeppniseftirlitið sem við vitum að leysir ekki neitt til lengri tíma, því að glæpamenn finna alltaf leiðir til að stunda sína iðju, einkum auðvitað ef hún felst í því að maka krókinn og stela, og vökulustu varðmenn sofna að endingu á verðinum. Ég er ekki sósíalisti, það skal skýrt tekið fram, en þetta er í huga mér einungis spurning um almenna skynsemi, ekki pólitískar kreddur.“