Jawaher Badran, átta barna móðir frá Palestínu sem leitað hefur verndar hér á landi, hefur nú, að kvöldi miðvikudagsins 1. nóvember, ásamt börnum hennar, verið flutt í rútu og færð frá Bæjarhrauni til Keflavíkur, þar sem fyrir liggur að flytja þau úr landi næsta morgun, þriðjudag.

Samkvæmt heimildum blaðamanns tók lögregla símann af móðurinni við flutninginn, í þessari aðgerð sem hófst án fyrirvara. Þá sagði heimildamaður að asi lögreglu við aðgerðina hefði verið svo mikill að fatnaður fjölskyldunnar, umfram það sem þau klæddust sjálf þá stundina, hefði orðið eftir í húsnæðinu að Bæjarhrauni.

Tíu mánuðir eru liðnir frá því að fjölskyldan kom til Íslands og sótti hér um alþjóðlega vernd. Þau eru frá borginni Tulkarem á Vesturbakkanum. Síðast þegar spurðist af áformum íslenskra stjórnvalda í máli þeirra, fyrr í haust, var það ætlun þeirra að brottvísa þeim til Spánar, í krafti Dyflinnarreglugerðarinnar. Svo virðist vera sem yfirstandandi stríðsátök hafi ekki haft áhrif á þau áform.

Samtökin Réttur barna á flótta greindu frá aðgerðinni á Facebook.