Magn hrauns í líklegum eldgosum á Reykjanesskaga næstu ár gæti orðið miklu meira en verið hefur í gosum undanfarið.

Þetta kom fram hjá Magnúsi Tuma Guðmunds­syni, pró­fess­or í jarðeðlis­fræði, á íbúafundi Grind­vík­inga í Laug­ar­dals­höll í gær­kvöld. Hann vísar til sögu jarðelda á Reykjanesskaga máli sínu til stuðnings.

Margir Grindvíkingar vilja uppkaup eigna sinna eins og skot. Aðrir ala þá von í brjósti að geta flutt aftur heim. Fram kom á fundinum í gær að ef allt þróast eins og best gæti orðið er möguleiki að þeir sem vilja búa áfram í Grindavík komist aftur heim en varla fyrr en næsta sumar.

„En ég vísa til sög­unn­ar. Ef þetta verður eitt­hvað svipað þá á eft­ir að gjósa þarna og koma miklu meira hraun upp, ef þetta ætl­ar að hegða sér eins og fyrri at­b­urðirn­ir,“ sagði pró­fess­or­inn um umbrotin.

Erfitt er að spá fyrir um hvar kvika brýst næst upp en landris er aftur hafið í Svartsengi og má telja líklegt að næsta eldgos brjótist út á næstu vikum. Virkur kvikugangur er undir Grindavík. Urðu straumhvörf þegar hraun rann inn í Grindavíkurkaupstað á sunnudag.

Magnús Tumi hefur áður í viðtölum við fjölmiðla bent á hve mikilvægt það er að vísindamenn sýni varkárni í ummælum er kemur að þessum náttúruhamförum. Telja fundargestir sem Samstöðin hefur rætt við að að orð prófessorsins á fundinum í gær beri að skoða í ljósi þess. Ástandið sé mjög alvarlegt.

Ekki er gefið að aðrar byggðir sem standa á viðkvæmum stöðum nálægt umbrotasvæðinu sleppi við jarðeldaógnina í framtíðinni.