Hvorki í minnihlutanum né meirihlutanum á Alþingi virðist nokkur þingmaður við svo búið vilja taka af skarið með að lýsa yfir að vantrauststillaga gegn Svandísi Svavarsdóttur matvælaráðherra verði lögð fram eftir helgi.
Samstöðin hefur rætt við fjölda þingmanna síðdegis og í kvöld. Fæstir vlja láta nokkuð hafa eftir sér. Minnihlutanum þykir málið snúið í ljósi þess að margir stjórnarandstöðuþingmenn voru á sama máli og ráðherrann þegar Svandís bannaði langreyðaveiðar með dags fyrirvara. Þeir benda á að ráðherrar þurfi þó að fara að lögum hvort sem málstaður þeirra er vinsæll eða „hvort freki karlinn heitir Kristjáns Loftsson eða ekki“ eins og þingmaður Samfylkingarinnar orðaði það. Staða Svandísar og jafnvel ríkisstjórnarinnar allrar gæti hangið á bláþræði.
Samstöðin spurði Hönnu Katrínu Friðriksson, þingmann Viðreisnar, á níunda tímanum í kvöld, hvort þingflokkur Viðreisnar muni leggja fram vantraust á Svandísi.
„Við höfum ekki enn komist að þeirri niðurstöðu,“ svarar Hanna Katrín. „Málið er auðvitað alvarlegt, en okkur þykir rétt að sjá hvernig ríkisstjórnin hyggst bregðast við.“
Ef vantraust verður boðið upp er engin leið að segja til um niðurstöðuna. Ýmsir meirihlutaþingmenn segjast tilbúnir að styðja ráðherrann ekki. Það á bæði við um Framsóknarflokkinn og Sjálfstæðisflokkinn. Húsbóndahollusta í samræmi við vilja formanna flokkanna gæti þó orðið uppi á endanum, bendir einn þingmaður á.
Staða Svandísar innan VG var sterk áður en álit umboðsmanns Alþingis féll henni í óhag. Einstakir þingmenn pírata og Flokks fólksins hafa sagt eftir álitið að hún eigi að segja af sér. Katrín Jakobsdóttir telur svo ekki vera. Málið er í hörðum hnút. Einn þingmaður meirihlutans segir í samtali við Samstöðina að málið sé hornsteinn á getu og samstöðu stjórnarandstöðunnar ekki síður en stjórnarinnar.
