Varnaðarorð umhverfissinna sem töldu óráð að fyrrverandi fjármálráðherra, Bjarni Benediktsson, hækkaði skatta á eigendur umhverfisvænna bíla virðast ekki hafa verið út í loftið.
Dæmi eru um að rafbílaeigendur og ökumenn tengitvinnbíla hugsi sinn gang eða hafi jafnvel tekið ákvörðun um að selja bíla sína og fara á aftur á bensín- eða díselbíla.
Um þetta er umræða í facebook-hópnum Rafbílar á Íslandi. Þannig greinir Baldvin Árnason rafbílaeigandi frá því að hann hafi keypt rafbíl til að spara. Nú líði að því að hann skipti aftur yfir á bensín vegna kílómetragjalds. Sparnaðurinn sé horfinn. Nefnir hann sem dæmi að bíll hans hafi kostað hann milljón umfram bensínbíl sömu tegundar. Hann hafi á bensínbíl eytt 30.000 krónum í bensín á mánuði en nú sé hann rukkaður aukalega um 10.000 krónur á mánuði og þegar allt sé lagt saman sé útkoman neikvæð.
„Þetta er bara ekki þess virði lengur,“ segir Baldvin. Hann nefnir sem ókosti drægni og þjónustuinnviði sem enn séu ekki á pari við bíla sem brenna jarðefnaeldsneyti.
„Ríkisstjórnin er búin að klúðra þessu gjörsamlega,“ segir hann.
Viðbrögð annarra umhverfisvænna bíla eru ekki á einn veg. Sumir taka undir með Baldvini sem hlýtur að vera stjórnvöldum áhyggjuefni vegna orkuskiptanna og mengunarinnar. Jarðefnabruni er ein helsta ástæða losunar gróðurhúsalofttegunda og veldur hamfararhlýnun.
Aðrir benda á að þetta sé væl og draga umhverfisávinning, hljóðleysi, forhitunarþægindi og ýmsa kosti rafbíla umfram aðra bíla inn í jöfnuna.
Gjaldtakan er nýhafin og mun skila ríkinu milljörðum árlega í kassann.