Vladimir Putín Rússlandsforseti lýsti yfir sigri í forsetakosningum í landinu í sjónvarpsávarpi í gærkvöldi og nýtti tækifærið til að lýsa einnig yfirburðum Rússa í árásarstríði sínu gegn Úkrarínu. Hann nefndi þá einnig nafn stjórnarandstæðingsins Alexei Navalny heitins í fyrsta sinn svo árum skipti opinberlega. Sagði Putín í því samhengi að dauðsföll væru alltaf sorglegir atburðir en það hefðu aðrir og fleiri látist í fangabúðum. 

Forsetakosningar í Rússlandi fóru fram um helgina við aðstæður sem alþjóðasamfélagið hefur lýst sem ólýðræðislegum og ófrjálsum. Samkvæmt yfirlýsingum landskjörstjórnar í Rússlandi hafði Putín fengið 87 prósent atkvæða þegar búið var að telja atkvæði úr 60 prósentum kjördæma. Hann hefur því tryggt sér fimmta kjörtímabil sitt í embætti og sitji hann það út mun hann hafa setið lengur en Jósef Stalín á valdastóli, og lengur en nokkur rússneskur leiðtogi í 200 ár. Kjörtímabil Rússlandsforseta er sex ár. 

Þátttaka í kosningunum nú var rúm 74 prósent, tæpum sjö prósentum meiri en fyrir sex árum síðan. 

Þegar Putín beindi orðum sínum að Navalny sagði forsetinn að fyrir dauða hans hefði staðið til að Navalny yrði hluti af fangaskiptum en skilyrðin fyrir þeim hefðu verið að stjórnarandstæðingurinn myndi ekki snúa aftur til Rússlands. 

Sigur Putíns var aldrei í minnstu hættu, enda eru helstu andstæðingar hans ýmist í fangelsi, í útlegð eða látnir eins og Navalny. Frambjóðandi kommúnista, Nikolay Kharitonv, virðist hafa verið í öðru sæti með tæplega fjögurra prósenta stuðning, miðað við bráðabirgða niðurstöður.