Eyðileggja Siglunes fyrir börnunum til að spara pening

Börn 6. des 2022

Tekin hefur verið ákvörðun um að loka Siglunesi með einu pennastriki, segir í áskorun til borgarbúa um að mótmæla þessu. Borgarráð samþykkti lokunina á miðvikudaginn síðastliðinn í hagræðingarskyni. Það væru dýrkeypt mistök að loka Siglunesi og með því væri tekið heljarstökk aftur á bak. Þar að auki er undirbúningur ákvörðunarinnar enginn en mat á áhrifum lokunarinnar á frístunda- og tómstundastarf barna liggur meðal annars ekki fyrir, segir í áskoruninni.

Áskorunina má lesa hér og þar getur fólk skrifað undir mótmælin: Björgum Siglunesi: einstöku æskulýðsstarfi á sjó.

„Í lok síðustu aldar var lyft grettistaki í að koma heilsu íslenskra ungmenna frá þeim slæma stað sem þau voru á til betri vegar,“ skrifar Steinar Þór Ólafsson íþrótta- og heilsufræðingur, í grein á Vísi. „Þáverandi borgarstjóri Reykjavíkurlistans, Ingibjörg Sólrún Gísladóttir, í samstarfi við ríkið stórefldu íþrótta- og æskulýðsstarf borgarinnar til að færa málaflokkinn á hærra plan. Verkefnið heppnaðist svo vel að hingað hafa þjóðir og borgir heimsins komið síðastliðna tvo áratugi til að læra af okkur um það sem kallað hefur verið íslenska forvarnarmódelið.“

Steinar skrifar um áætlanir um að loka Siglunesi í Nauthólsvík og færa starfsemina “í framtíðinni” í hendur íþróttafélags. „Starfsemi Siglunes er einstök, fyrst og fremst fyrir þær sakir að þar er ekki rekið hefðbundið íþróttastarf. Iðkendur stunda ekki æfingar, keppa ekki og þar er engin afreksstefna. Þar fá hinsvegar öll börn, og sér í lagi þau sem ekki finna sig í hefðbundnu afreksstarfi íþróttafélaganna, að finna kröftum sínum viðnám til að eflast og þroskast á jafningja grundvelli. Mikilvægur fjölbreytileiki í íslenska forvarnarmódelinu,“ skrifar Steinar.

Steinar segir fyrrum starfsmenn þekki þetta vel, en hann var iðkandi í Siglunesi sem barn og síðar sumarstarfsmaður í mörg sumur. „Síðustu daga hefur vakna hreyfing um sjötíu fyrrum starfsmanna Siglunes sem reynt hafa með samtakamætti að senda frá sér neyðarkall svo tryggja megi að börn framtíðarinnar njóti þeirrar útimenntunar og heilsueflingar sem starfsemin hefur falið í sér hjá um þúsund einstaklingum hvert einasta sumar,“ skrifar Steinar.

Þessi hópur mun standa fyrir táknrænum mótmælum í hádeginu í dag. Fyrir fund borgarstjórnar verður blásið í neyðarflautu þrjú stutt, þrjú löng, þrjú stutt. Þetta segir Steinar að sé síðasta neyðarkallið um að taka mál Siglunes til skoðunar áður en ákveðið verður að loka 55 ára farsælli starfseminni endanlega enda sannað að fjölbreytt æskulýðsstarf er forsenda heilbrigðra samfélaga.

Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Skrá mig arrow_forward

Rauða borðið
í beinni
Rauða borðið, 24. maí