Heiður Margrét Björnsdóttir segir í Tímarirti Sameykis að velsæld fólks í íslensku samfélagi hafi ekki verið haft að leiðarljósi í gerð fjáraukalaga ríkisstjórnarinnar, heldur sé einblínt á hagvöxt á hvern einstakling. Hún segir að ákvarðanir ættu alltaf að taka mið af samfélagslegum áhrifum og velsæld allra íbúa en ekki eingöngu fjárhagslegum áhrifum.

„Hér á landi eru umsvif ríkissjóðs og stefna ríkisstjórnarinnar hverju sinni bundin umgjörð sem lög um opinber fjármál skapa. Orðið velsæld kemur hvergi fyrir í þeim lögum, hið sama á raunar við um orðin íbúi eða fólk.“

Heiður segir að út frá sjónarmiði hagfræðinnar ætti alltaf að vera keppikefli stjórnvalda að skapa samfélag þar sem flestir lifa við kjöraðstæður svo þeir geti búið við góðan hag og liðið vel. Ríkisstjórnin þurfi að gera betur.

„Á sama tíma verðum við að hafa metnað til að gera alltaf betur. Staðan nú er sú að gæðum er misskipt, tugir þúsunda heimila eiga erfitt með að ná endum saman, 40 prósent tekjulægstu fjölskyldnanna eiga nánast ekki neitt, við erum ekki að ná loftslagsmarkmiðum okkar og geðheilbrigði ungs fólks hérlendis fer snarversnandi,“ segir Heiður Margrét.

Frétt af vef Sameykis. Hægt er að lesa grein Heiðar hér: Velsæld fyrir alla.