Félag atvinnurekenda hefur óskar eftir því að borgaryfirvöld taki þátt í „samstarfsverkefni“ um rafvæðingu vörubíla. Markmiðið sé að rafvæða flutningabílaflotann og krefst félagið aðgerða af hálfu borgarinnar. Þannig verði undanþágur veittar frá reglum um hámarkslengd vörubifreiða í miðborginni og rafknúnir vöruflutningabílar fái heimild til að aka á sérakreinum strætó og neyðarumferðar.
Bréf Félags atvinnurekenda var birt á fundi umhverfis- og skipulagsráðs 25. janúar sl. Það hafði áður verið sent á Einar Þorsteinsson formann borgarráðs þann 7. október 2022. Ákveðið var að vísa því þaðan til umsagnar umhverfis- og skipulagssviðs, skrifstofu samgöngustjóra og borgarhönnunar. Í því vísaði félagið til þess „góða samstarfs“ sem tekist hafi með Reykjavíkurborg og að vonir stæðu til að því yrði haldið áfram.
Vegna þess hve dýrir rafknúnir vörubílar á Íslandi væru var mikilvægi þess ítrekað að borgaryfirvöld tæku þátt í rafvæðingunni. Minnst var á að rafknúnir vörubílar væru 2,7 til 3,6 sinnum dýrari en sambærilegir dísilbílar. Ekki kom þó fram í bréfinu væntanlegur sparnaður sem felst í rekstri rafbifreiða til lengri tíma, enda raforka ódýrara en olía.
Í lok bréfsins voru svo birtar kröfur félagsins gagnvart borginni. Sú fyrsta var sú að borgin skyldi veita undanþágu frá reglum um hámarkslengd vörubifreiða sem nota má við vörudreifingu í miðborginni. Núgildandi reglur kveði á um 8 metra hámarkslengd, en ákjósanlegra væri að hafa hana í kringum 8,5 metra. Seinni krafan var sú að rafknúnum vörubifreiðum yrði heimilt að keyra á sérakreinum strætó, leigubíla og neyðarumferðar. Þetta myndi skv. félaginu veita fyrirtækjum í vörudreifingu „öflugan hvata“ til að ráðast í fjárfestingu á rafdrifnum vörubílum.
Framkvæmdastjóri Félags atvinnurekenda Ólafur Stephensen er skrifaður fyrir bréfinu. Lesa má það í heild sinni hér.
