Vilhjálmur Birgisson, formaður SGS kallar eftir tafarlausum aðgerðum til að stöðva „græðgivæðingu“ á leigumarkaði. Dæmi séu um 40% hækkun leiguverðs á einu ári.
Vilhjálmur birti færslu á Facebook-síðu sinni í morgun þar sem hann segir frá einstæðri móður sem leigir hjá Ölmu leigufélagi. Hann segir aðfarir félagsins ekki einsdæmi á leigumarkaði og þær hækkanir sem eigi sér stað séu ekkert annað en ofbeldi.
Í færslunni segir Vilhjálmur frá því að sú vísitöluhækkun sem orðið hefur undanfarið virðist aðeins vera brot af þeim hækkunum sem dynji á leigjendum. Téðri konu hafi jafnframt verið tilkynnt að til að endurnýja leigusamninginn verði hún að samþykkja frekari hækkun leigunnar og hafi leigan þá hækkað á tólf mánuðum um 42%, eða langt umfram neysluvísitölu.
„Þessi einstæða móðir hefur leigt hjá Ölmu í 2 ár en í byrjun leigði hún á 190.000 kr. og núna tveimur árum seinna er leigan að fara í 267.000 kr. og hefur því hækkað um 77.000 kr.,“ segir Vilhjálmur en færsluna má lesa hér fyrir neðan.
