Pawel Bartoszek, varaborgarfulltrúi Viðreisnar, segir ástand útlendingamál sé alfarið Sjálfstæðisflokknum að kenna og því hlægilegt að hlusta á flokksmenn kvarta og kveina undan stöðu mála. Flokkurinn hefur stýrt dómsmálaráðuneytinu frá árinu 1991, að fráskyldu stuttu tímabili þar sem Ögmundur Jónasson var dómsmálaráðherra. Hann spyr hvort Sigríður Andersen, Áslaug Arna Sigurbjörnsdóttir, nú eða Jón Gunnarsson hafi verið í vasanum á No Borders-samtökunum.

„Nú eru 10 ár liðinn síðan Ögmundur Jónasson hætti sem dómsmálaráðherra. Þar áður þarf að leita til ársins 1991 til að finna kjörtímabil þar sem einhver annar flokkur en Sjálfstæðisflokkur var með það ráðuneyti. Það er því erfiðara að finna málaflokk þar sem ábyrgðin er skýrari heldur en málefni útlendinga. Þau eru í þeim farvegi sem þau eru, góðum eða slæmum, vegna þess hvernig Sjálfstæðisflokkurinn hefur haldið á þeim. Ekki einhver annar,“ bendir Pawel á á Facebook.

Hann segir að Sjálfstæðisflokkurinn láti eins og flokksmenn hafi aldrei komið nálægt þessum málaflokki. Það sé vesælingsháttur. „Nú mætti halda, á ummælum penna og fótgönguliða flokksins að XD hafi loksins hrifsað til sín dómsmálaráðuneytinu úr höndum einhverra aktivista. Voru Sigga Andersen, Áslaug Arna eð Jón Gunnarsson öll í vasanum á No Borders samtökunum? Þvílíkur og annar eins ábyrgðaflótti og vesælingsháttur,“ segir Pawel.

Hann segir að fólk verði að átta sig á því að ef allt fer að fyllast af heimilislausu fólki þá er það fyrst og fremst Sjálfstæðisflokknum að kenna. „Og áður en menn benda út og suður á aðra flokka og félagasamtök, mætti frekar krefjast að stjórnin sjálf hefði eitthvað plan um næstu misseri. Það dylst engum að forsætisráðherra, félagsmálaráðherra og dómsmálaráðherra hafa talað þvert á annað um hvað það sjá fyrir sér að gerist. Og ef að hraungjótur, húsasund og gistiskýli byrja að fyllast af heimilislausu fólki þá verður það heldur ekki skrifað á einhver No Borders samtök, sjálfboðaliða eða pólitíska andstæðinga. Heldur stjórn þessa lands.“