Síðastliðinn júlí sagði Arnar Þór Jónsson, varaþingmaður Sjálfstæðisflokksins, það lýsandi fyrir ríkisstjórnina hvernig sumir ráðherrar, og þá sérstaklega forsætisráðherra, virtust flýja í faðm erlendra ráðamanna til að losna undan kraumandi reiði á Íslandi. „Meðan vandamálin hlaðast upp innanlands er gott að geta sótt ráðherrafundi erlendis og hitta þar góða ,,kollega“ sem hægt er að faðma og kyssa, því jafnvel á flokksráðstefnum heima fyrir finnst ekki slík þægileg samstaða og skilningur,“ skrifaði Arnar Þór.
Það er óhætt að segja að Arnar Þór var ekki að ímynda sér hve mikið Katrín Jakobsdóttir hefur verið í útlöndum í ár, því samkvæmt svari forsætisráðuneytisins við fyrirspurn frá RÚV þá hefur Katrín verið samtals 37 daga erlendis síðasta ár. Á síðustu tólf mánuðum hefur Katrín farið 16 sinnum til útlanda. Raunar hefur hún farið enn oftar út því ráðuneytið telur ekki með ferðalög hennar á eigin vegum. Oftast fara tveir starfsmenn forsætisráðuneytisins með henni í þessar vinnuferðir.
Katrín vísar í innrás Rússa í Úkraínu sem eina ástæðu fyrir þessum miklu ferðalögum. En samkvæmt svari ráðuneytisins virðist áhugi hennar einnig ráða talsvert för. „Þá tengist alþjóðastarf helstu áherslumálum forsætisráðherra á alþjóðavettvangi sem eru jafnréttismál, mannréttindi, málefni velsældarhagkerfisins og loftslagsmál,“ segir í svarinu.
