„Ég vil sérstaklega beina orðum mínum til hagsmunagæslumanna þjóðarinnar á Alþingi. Þeir einir geta breytt okri og græðgi bankanna með lagasetningu. Spilling og siðleysi sem lántakendur hér á landi búa við hefur rækilega opinberast síðustu daga. Mikil umræða hefur orðið um málefnið og fólk hefur birt greiðsluseðla sem sýna bankaokrið og ræningjastefnuna svart á hvítu.“

Þetta skrifar Jón Norðfjörð í aðsendri grein sem birtist í Morgunblaðinu. Hann hefur áður vakið athygli því sem hann kallar bankarán um hábjartan dag, geræðislegu okri íslenskra banka. Hann segir að viðbrögð við síðasta pistli hans sýna vel að hann hefur nokkuð til síns máls.

„Það kom mér ekki á óvart hvað greinin mín sem birtist í Morgunblaðinu 14. okt. sl. með fyrirsögninni „Bankarán um hábjartan dag“ vakti mikla athygli. DV greindi ítarlega frá málinu. Ég fór í viðtal í Bítið á Bylgjunni og víðar í fjölmiðlum og á samfélagsmiðlum hefur mikið verið fjallað um okur bankanna í lánamálum, meðal annars með viðtölum við ýmsa aðila. Ég fékk mikil viðbrögð og greinilegt að mjög margir þjást fjárhagslega og eru á barmi örvæntingar vegna svívirðilegrar okurstefnu í vaxtamálum,“ segir Jón.

Hann segir að því miður hafi viðbrögð Íslandsbanka ekki verið eins góð.  „Það eru ekki bara heimilin sem þjást, margir bændur og fyrirtæki eru mjög illa á vegi stödd. Á sama tíma berja bankastjórnendur sér á brjóst og þrír stærstu okurbankarnir kynntu ofurhagnað sinn fyrstu níu mánuði ársins sem er um 60 þúsund milljónir króna. En Íslandsbanki varpaði sprengju. Tilkynning kom frá bankanum um vaxtahækkanir á útlánum, meðal annars að fastir vextir óverðtryggðra húsnæðislána myndu hækka um 0,8 prósentustig. Engar skýringar fundust frá bankanum, en risastór sekt vegna lögbrota hans við sölu á hlut ríkisins gæti verið ástæðan. Þannig gæti Íslandsbanki látið viðskiptamenn sína greiða sektina eða hluta hennar. Þvílíkur ósómi ef rétt reynist,“ segir Jón.

Hann tekur undir með þeim sem kalla eftir því að Ásgeir Jónsson Seðlabankastjóri verði rekinn. „Fyrir ráðamenn þjóðarinnar er engin undakomuleið með að finna lausnir sem duga til að koma fólki og fyrirtækjum úr þeim fjárhagslegu fjötrum sem þeir hafa sannarlega skapað skilyrði fyrir. Fólk á skýlausan rétt á að geta búið við fjárhagslegt öryggi. Stjórnvöld réðu seðlabankastjóra og hann geystist fram á fjármálavöllinn og lækkaði vexti á miklum hraða. Hann birtist eins og súpermann og var svo klár og vinsæll að Stöð 2 sá ástæðu til að kjósa hann mann ársins 2022. Fólk tók lán til húsnæðiskaupa á viðráðanlegum vöxtum í góðri trú um að nú væri loksins komið fólk með viti í Seðlabankann. En seðlabankastjóri var ekki lengi í Paradís. Mikil mistök höfðu verið gerð með alltof hröðum vaxtalækkunum. Verðbólga fór vaxandi og nokkrum vikum seinna voru bankarnir komnir með okrið upp úr öllu valdi og fólk stóð varnarlaust í boði stjórnvalda og Seðlabankans,“ segir Jón og bætir við að lokum:

„Fyrirkomulag lánamála er bara mannanna verk. Engin samkeppni virðist vera milli bankastofnana og „lánasamningar“ eru í raun ekki samningar, heldur skilyrði sem lántakendur hafa ekkert um að segja. Það er alveg ljóst að bankaokrið hvílir þungt á mörgum. Stjórnvöld verða að taka málið föstum tökum. Þetta verður að stöðva og það verður að leysa fólk úr gildrunni.“