Ísraelsher hefur ráðist inn í Nasser-sjúkrahúsið í Khan Younis á Gaza-ströndinni. Heimildarmenn á staðnum greina frá þessu og að skotið sé með vélbyssum og stórskotaliðsvopnum. 

Samkvæmt frétt Al Jazeera fréttastofunnar hefur herinn ráðist á fæðingardeild sjúkrahússins, á bæklunardeild þess og bráðadeild. Tugir eru særðir og ótilgreindur fjöldi er látinn. Enga læknisaðstoð er hægt að veita þeim særðu á sjúkrahúsinu í aðstæðunum og var öllu heilbrigðisstarfsfólki smalað saman og hendur þess bundnar á bak aftur. Heimildarmenn Al Jazeera segja einnig að ísraelski herinn ráðist að fólki bæði innan veggja sjúkrahússins, sem og utan við það.

Læknar án landamæra greina frá því á Twitter að læknar á þeirra vegum á sjúkrahúsinu lýsi því að glundroði ríki þar. Sömu læknar staðfesta að fjöldi fólks sé ýmist látið eða sært. Eins læknis á vegum samtakanna er saknað og annar var færður í hald af ísraelskum hermönnum. Læknalið var tilneytt til að flýja sjúkrahúsið og neyddist til að skilja fjúklinga eftir.  Samtökin krefjast þess að ísraelar hætti árásum og dragi herlið sitt til baka. Minnt er á að sjúkrahúsið eigi að njóta verndar undir alþjóðalögum. 

Hamas-samtökin hafa í yfirlýsingu lýst því að árásin sé áframhald útrýmingarstríð Ísraela. Ísraelsher heldur því fram að hann hafi áreiðanlegar heimildir fyrir því að Hamas haldi gíslum innan veggja sjúkrahússins. Herinn hefur ekki lagt fram neinar sannanir fyrir þessum fullyrðingu. Hamas samtökin hafa neitað því að svo sé og segja fullyrðingar þar um, sem og að samtökin noti sjúkrahúsið sem bækistöð séu lygar.