Sigríður Á. Andersen, fyrrverandi dómsmálaráðherra og þingkona Sjálfstæðisflokksins, er meðal þeirra sem sóttu um embætti ráðuneytisstjóra í fjármála- og efnahagsráðuneytinu. Hún sagði af sér sem dómsmálaráðherra árið 2019, eftir að Mannréttindadómstóll Evrópu komst að þeirri niðurstöðu að Sigríður hefði brotið stjórnsýslulög við skipan dómara í Landsrétti. Hún féll svo af þingi eftir að hafa beðið afhroð í prófkjöri Sjálfstæðisflokksins árið 2021.
Þess má geta að annar þingmaður fékk afspyrnu lélega kosningu í þessu sama prófkjöri, Brynjar Níelsson. Hann endaði í fimmta sæti, en hafði sóst eftir öðru sætinu, líkt og Sigríður. Hann hóf störf hjá fjármálaráðuneytinu síðastliðinn október.
Auk Sigríðar sótti Tómas Brynjólfsson, settur ráðuneytisstjóri, um embættið. Hann hefur starfað lengi innan ráðuneytisins en hann er þó þekktastur fyrir að hafa staðið að baki því að fjármálaráðuneytið lagðist gegn því að Þorvaldur Gylfason, prófessor í hagfræði við Háskóla Íslands um áratugaskeið, yrði ráðinn sem ritstjóri fræðitímaritsins Nordic Economic Policy Review. Samstöðin fjallaði nánar um það mál á dögunum.
Auk þeirra tveggja sóttu sex aðrir eftir embættinu:
Esther Finnbogadóttir, leiðandi sérfræðingur
Guðrún Ögmundsdóttir, skrifstofustjóri
Jóhann Ágústsson, viðskiptafræðingur/ráðgjafi
Matthías G. Pálsson, fastafulltrúi Íslands hjá FAO, WFP og IFAD í Róm
Sigríður Kristbjörnsdóttir, löggiltur endurskoðandi, fjármála- og verkefnastjóri
Sigurður H. Helgason, forstjóri