Ótal smærri fyrirtæki hafa reynst boðin og búin að leggja Grindvíkingum lið á einn og annan veg undanliðna daga. Hótel á Selfossi hefur látið vita að Grindvíkingum standi laus hótelherbergi til boða, endurgjaldslaust, ein verslun í Reykjavík lætur foreldra vita að grindvísk börn sem eiga afmæli geti fengið þar afmælisvörur sér að kostnaðarlausu, önnur býður grindvískum jólasveinum aðstoð við skógjafir. Bílaleiga nokkur býður Grindvíkingum frían bíl til afnota og kvikmyndahús býður Grindvíkingum frítt í bíó til 1. desember.
Eru þá aðeins talin boð nokkurra þeirra fyrirtækja sem hafa komið þeim áleiðis undanliðna daga, en ótalin sú samstaða sem almenningur hefur sýnt um húsaskjól og fleira. Facebook-hópurinn Aðstoð við Grindvíkinga er einn helsti vettvangur samskipta milli flóttafólksins frá Grindavík og þeirra sem bjóða þeim aðstoð.
Andblær þessara boða er óneitanlega af öðrum toga en sá sem barst frá Samtökum atvinnulífsins í upphafi vikunnar, er þeim lá mest á að minna fyrirtæki í Grindavík á að þau þurfi ekki að greiða starfsfólki laun á meðan náttúruhamfarir aftra rekstri.