„Ég ætla aðeins að fjalla hér um störf þingsins að þessu sinni. Flest þekkjum við hvernig kýrnar láta þegar þeim er sleppt út í fyrsta skipti á vorin. Þær sletta úr klaufunum,“ sagði Karl Gauti Hjaltason Miðflokki á Alþingi í gær.

Hann hélt áfram:

„Tilburðir ríkisstjórnarinnar minna svolítið á þessi gleðilæti kúnna. Það eru einungis fimm mánuðir síðan þessi ríkisstjórn tók við völdum en hæstvirtir ráðherrar eru heldur betur búnir að traðka á túninu. Ekkert skattsvið samfélagsins fær frið fyrir sparki hæstvirtrar ríkisstjórnar; sjávarútvegurinn, landbúnaðurinn, ferðaþjónustan, hjón og sambúðarfólk, landsbyggðin, bifreiðaeigendur. Stórum málum er hent illa undirbúnum inn á þingið og ætlast til að þingið stimpli þau umræðulítið.

Nýjum málum, sem eru gríðarstór, er svo hent inn með engum fyrirvara og á meðan spóka forsvarsmenn ríkisstjórnarinnar sig erlendis og skilja svo ekkert í því hvers vegna ekkert gangi hjá þeim hér heima. Það nýjasta á vettvangi ríkisstjórnarinnar er að formaður háttvirtrar allsherjar- og menntamálanefndar hefur gefið fyrirmæli út um allan bæ, og fólk er nú vant því að hlýða þeim formanni, þegar ljóst er að eini aðilinn sem getur frestað brottflutningi í þessu tilviki er og var hæstvirtur dómsmálaráðherra Viðreisnar.

Eini til þess bæri aðilinn í kerfinu til að fresta slíkum brottflutningi er ráðherra sjálfur. Maður áttar sig ekki alveg á samspili flokkanna í þessu máli þegar formaður allsherjar- og menntamálanefndar, þingmaður Samfylkingarinnar, er látinn vinna þetta verk sem ráðherra Viðreisnar var bær til að gera.“